講題：忠心
經文：啟示錄3章7-13節
信息：
弟兄姊妹：平安！
在末日上主獎賞所有的教會的時，你想叨一間教會會得可得著上大、上多的謳樂？
咱的答案有可能是美國的馬鞍峰教會，有可能是韓國的純福音教會，或是其他咱所知影的大間教會…；咱的教會非常有可能無在咱的答案中。咱的教會豈無可能在末日得著上主上多、上大的謳樂？
咱來看聖經安怎講？
這張寫給非拉鐵非教會的批，與頂面五張批一樣，榮光的主耶穌做自我的介紹。諸個自我介紹與收批的教會所遇著的情景有密切的關係。榮光的耶穌安爾向非拉鐵非教會介紹他自己：「是聖、是真、有大衛的鎖匙、開就無人會關，關就無人會開的」。
●是聖
「是聖」是指榮光的主耶穌與這世界的神明完全無同款，而是人唯一敬拜的對象。「聖」這個字，舊約將它用在「上主」的身上。在這張批用多多舊約的名詞或觀念，有可能是因為非拉鐵非教會面對著猶太教的排斥。榮光的主耶穌將舊約用於上主身上的字眼用於自己的身上，是的表明自己就是上主的獨生子，和上主同體同質。猶太教無承認耶穌就是伊所期待的彌賽亞，所以榮光的主耶穌用「聖」來表明自己就是救世主彌賽亞。
●是真
「是真」有兩層的意思。頭一層的意思是「真的」，不是假的。猶太教徒講排拉鐵非教會所信的耶穌是假的彌賽亞；榮光的主耶穌講，我是「真的」，真的救世主彌賽亞。
「是真」的第二層的意思是「信實」。
非拉鐵非城的土地非常肥，適合栽種葡萄。葡萄為伊帶來足大的經濟利益。這個城有一項鄙，就是接接地動。在主後17年，一個大地動將這座城搖到東倒西歪。羅馬政府為著幫助這座重建，就容許伊五年免繳稅。這個政策使得非拉鐵非的百姓非常感激羅馬政府。但是在主後92年，羅馬政府下令非拉鐵非百姓將一半的葡萄樹剷除，改種其他的農作物。但非拉鐵非的土質只有適合於葡萄，無適合其他的農作物，致到收成減少一半；而且葡萄欲大欉到會結果子，需要幾若年的時間。這個錯誤的政策使得非拉鐵非的百姓非常痛恨羅馬政府。
榮光的主耶穌講他是信實的，是和許個為著顧著自己的利益來犧牲人民的君王作一個對比。榮光的主耶穌講他是信實的，就是講他對他的子民的疼是從頭到尾，絕對未在半途將疼收回。
●有大衛的鎖匙
接續榮光的主耶穌介紹自己「有大衛的鎖匙、開就無人會關，關就無人會開的」。
非拉鐵非城的猶太人排斥基督徒，不准伊踏入伊的會堂，又講：基督徒無資格進入天堂。榮光的主耶穌講，「我有大衛的鎖匙。」大衛的鎖匙是什麼？咱知救世主彌賽亞是大衛的後裔，他的國度就是天國，就是天堂。所以「大衛的鎖匙」就是打開天堂大門的鎖匙。榮光的主耶穌有這隻鎖匙，他若為非拉鐵非教會打開天堂大門，無人會關得；他若將天堂大門關的，不准許個困逐教會的猶太教徒進入，無人會開的，連猶太教徒所誇口、所依靠的亞伯拉罕也無才調。
榮光的主耶穌在自我介紹了後，就勸勉非拉鐵非教會講：
「我知你的所做…你有淡薄氣力，已經守我的道理，未曾不認我的名。」
●忠心
榮光的主耶穌會得可看見人內心上深沉的心思意念，他看見非拉鐵非教會對他的忠心。非拉鐵非城常常遇著地動，在主後17年大地震了後，雖然在羅馬政府的協助之下，家園受重建，但是百姓對這座失去信心，有機會就搬徙到外地。所以這座城的人口愈來愈少；相對的，非拉鐵非教會的會友數也漸漸的流失。在主後92年， 羅馬政府野霸的政策破壞這座城的經濟，百姓失去財源，成作宋鄉。非拉鐵非教會的信徒本來就是弱勢的一群，城的經濟受破壞，伊都更較宋鄉。在這種只有「淡薄氣力」的情況下，遇著猶太教徒與地方政守的壓迫，伊猶原堅持伊的信仰，猶原告白耶穌是主。在彼當時，羅馬政府對猶太教徒特別優待，保護伊，給伊敬拜上主的 自由。所以彼當時，猶太教徒若肯接納基督徒，承認教會從猶太教出來，安爾，教會就未受地方政府的困逐。但猶太教不肯承認耶穌就是救世主彌賽亞，批評教會是撒但的一會，就不肯容許教會依伊，致到教會受著地方政府的壓迫。非拉鐵非教會並無為著依猶太教來逃閃地方政府的壓迫，就講耶穌不是彌賽亞。
就因為非拉鐵非教會忠心，所以榮光的主耶穌獎賞伊。
●獎賞
第一個獎賞是「進入天堂」的權利。榮光的主耶穌安爾講：「我在你的面前已經有加你開門，是無人會關得的。」
第 二個獎賞是「參與末日審判」的榮光。榮光的主耶穌安爾講：「我欲賞賜你俾伊來仆於你的腳前。」「伊」是指猶太教徒。在末日的審判，上主邀請非拉鐵非教會的信徒坐於審判台來審判，受審判的猶太教徒就仆在伊的腳前。在進前，非拉鐵非教會是何等懇切祈求猶太教徒保護伊，在末日的審判，猶太教徒仆於伊的面前受審 判。
許個拒絕保護基督徒的猶太教徒，榮光的主耶穌責備伊是撒但的一會。為什麼安爾責備伊？因為伊講伊是上主的選民，卻拒絕耶穌作伊的救主，所以伊不是。伊不是卻講伊是，這就是白賊。魔鬼是講白賊的，是講白賊的的老父。所以耶穌纔會責備許個猶太教會是撒但的一會。
第三個獎賞是「被疼」的榮光。上主藉著邀請非拉鐵非教會信徒坐於審判台來參與審判，向許個受審判的猶太教徒證明，伊就是上主所疼的。
第四個獎賞是「不免又受試」的權利。在榮光的主耶穌來審判世間的進前，上主會降落一個大試煉在世間。通過這個試煉的都受迎接進入天堂，無通過這個試煉的都和不信的攏拋入地獄。但是非拉鐵非教會已經通過試煉，伊已經證明自己的忠心，所以伊不免又受試。
●勸勉
在四個獎賞了後，榮光的主耶穌又勸勉非拉鐵非教會講：「我緊緊到，你所有的著持守它，免得有人搶你的冕旒。」這個勸勉就是的提醒非拉鐵非教會講，煮熟的鴨子還是有可能飛走。雖莽已經有四個獎賞為非拉鐵非教會備辦下的，但是伊若在困逐中失警醒受迷惑來跋倒，上主就欲將彼四個獎賞收回。在彼個時，非拉鐵非教會尚的承受猶太教和地方政府的困逐。
如果非拉鐵非教會通過這個困逐。有一個大大的福氣的等候伊。榮光的主耶穌講：「得勝的人，我欲使伊作柱於我上主的殿內，決斷無復出去外面。」
得勝的人，就是通過困逐的。榮光的主耶穌欲俾伊永永住在上主的殿內。咱知厝的柱仔若徙開，厝尾頂就會崩落來。所以咱未去徙柱仔，除非欲改建。榮光的主耶穌就用這個圖像的加非拉鐵非教會講，伊若得勝，就永永住在上主的殿內。
榮光的主耶穌又講：「我也欲將上帝的名以及我上帝的城（新的耶路撒冷從天、從我的上帝降落的的名），又用我新的名，攏寫著伊的頂面。」將名寫於人的身上，就表示這個人是我的。在此榮光的主耶穌保證，非拉鐵非教會的信徒若通過困逐，上主就欲講，「這個人是我的！」；主耶穌也欲講，「這個人是我的！」；上主的城，就是新的耶路撒冷，就是天堂，也欲講，「這個人是我的住民。」
●同樣的應許
最後主耶穌講：「有耳孔的，著聽聖神給諸個教會所講的。」意思就是講，無論叨一間教會，若所遇著的境遇和非拉鐵非教會同款的，給非拉鐵非教會的應許，也欲給伊。
●上主看重的教會
咱一向認為一間增長的教會纔是上主所歡喜的教會，而且愈增長的教會俞是上主所歡喜的。教會是不是有的增長，咱非常清楚在教會界是用下列幾個標準的評定：Ⅰ人數的多少；Ⅱ事工的多少；Ⅲ建築物的大小與豪華的程度。
這款的標準是有它的根據。一間教會偌親像一個人的身體一樣，身體若健康，自然就會生長、生涎。同款一間教會若健康，就會生長、生涎。健康的教會一定有多多靈命非常嫷、非常勇壯的信徒，因為疼主的關係，伊願意奉獻伊的金錢、時間，貢獻伊的才能，來給主差用。所以教會的事工愈來愈多，愈來愈大，教會的奉獻也愈來愈多，教會的建築物愈換愈大間，愈起愈豪華；因為伊疼主，所以主將得救的人額賞賜給伊。
不過諸個標準是出於人，不是出於上主。若用這個標準來檢驗非拉鐵非教會，這間教會就排未著頂來得著上主的謳樂。這間教會，因為地方的人不斷外移，人數愈來愈少；而且這間教會，在當地，因為對社會無有什麼影响力，受著猶太人的排斥，也受著本地方的人的輕視。如果用咱一般的用的標準來看，這間教會不偌不是增長的 教會，而且是的衰退的教會。
但是在今仔日咱所看的經文中，這間教會卻得著主耶穌的大大謳樂和報償–為什麼？為什麼她會得可得著即爾大的榮光？
這個問題的答案是在耶穌所設的一個比喻，就是《領五千、二千與一千》這個比喻中。在這個比喻中，咱可看見主人對彼個領五千又賺五千的奴僕的謳樂，與對彼個領二千又賺二千的奴僕的謳樂是同款。換句話講，上主所看重的不是才能，是忠心；不是成就，是盡心。彼個領二千的盡心去做生理，賺二千；彼個領五千的盡心去做生理，賺五千。就因為平平攏是盡心，所以上主給伊的獎賞攏同款。彼個領一千的受責備，不是因為做生理了錢，是他無用心去運用主人所交託的錢銀去賺錢。如果他有用心去運用彼筆錢，就算他驚自己無作生理的才調來了錢，也會將錢lo在錢店生利息。
所 以非拉鐵非教會會得可得著上主的謳樂，是因為她的忠心，對上主的忠心。雖莽教會遇著困逐，雖莽教會在社會受看輕，伊猶原堅持伊的信仰。就因為上主看重的不 是才能是忠心，不是成就是盡心，所以就算咱的教會有一百萬以上的會友，就算咱的教會的事工不偌遍滿全台灣，在世界每一個國家攏有宣教團隊，就算咱的教會的土地有三重埔許爾闊，如果咱無忠心於上主，咱不但未得著上主的謳樂，反轉受上主的責備。
●上主看重的服事
在教會的事工也是安爾。咱總掠作有才能的，有傑出表現的，是上主所放的；但上主對事工的要求，不是才能是忠心，不是成果是盡心。保羅於《哥林多前書》有安爾講：「所盼望於管家的，是愛得他盡忠。」（4:2）咱常常會因為驚了做不好來推辭教會的事工。「驚了做不好」是人對事工負責任的表現，若有人會做得比咱較好，咱當然要將事工讓給他做；但若事工無人做，無人欲做，咱宜拿來做。只要咱有盡心的做，上主都會獎賞咱，講：「好又盡忠的奴僕。」
咱做一項代誌無可能攏頂所有的人的意，加減有人會嫌。「嫌」，是的加咱講，咱有進步的空間，咱有改進的機會。咱著感謝他的「嫌」。如果咱是的嫌別人的人，咱要問自己，明明咱比伊較會，為什麼咱不出來服事？咱有心來服事上主與他的教會否？咱若無心，啥事批評彼個有心的？
在《加拉太書》6章，保羅對加拉太教會有安爾的勸勉–「咱行好，不可失志；因為若無chih-cham， 到期會收成。所以尚有機會，咱著行好於眾人，於許個從信成作一家的人又較著致意。」這個「尚有機會」就是無論什麼時陣，機會若來就馬上抓牢。在教會事奉，就是行好於兄弟姊妹。聖神通過保羅的嘴勸勉咱著抓牢機會來事奉。所以人若不肯做的，咱都撿起來做。咱若用心的做，為主來做，上主的確欲獎賞咱。
●持守信仰，熱心服事
弟兄姊妹：
咱的教會的排名應該不是在頭前；但是咱猶原有可能得著上主的謳樂與獎賞。所以咱不可因為教勢來失志。咱若忠心，無論在什麼境遇，無論遇著什麼遭遇，永永無棄捨咱對上主的信。安爾，就有大大的獎賞的等候咱。
咱也不可因為自己的才能無夠來失志。如果有比咱較能才能的，他若欲做，都給他做。豈採因為都合的關係，他若未當做，咱就撿起來做。上主不是看咱的才能，是看咱的忠心；上主不是看咱的成就，是看咱的盡心。而且有可能因為你肯卻服事，上主就將事工需要的能力加添給你。上主安怎對摩西講？他講：「創造人的嘴是是誰啊？俾人啞口，臭耳聾，目睭金、睛盲的，是是誰啊？豈不是我耶和華嗎？」（出4:11f）
No comments:
Post a Comment