講題：為主所用
經文：路加福音書19章28－38節
弟兄姊妹：平安！
主耶穌是主人，咱是他的奴僕，凡他所講的，凡他所要的，咱攏著去行、去做。當咱告白「耶穌是主，是主人」的時，就是的講，「你叫我做啥，我就做啥；你要我安怎，我就安怎」。
●亞伯蘭離開吾珥
亞伯蘭在兩河流域的吾珥住好好。吾珥，在彼當時算是大都市，是商業和政治中心。上主卻要亞伯蘭離開故鄉，而且沒加他講要他去叨位，不過應許他說：「你著離開本地、本族、老父的家，去我所欲指示你的地。我欲乎你成作大國。我欲賜福你，乎你的名作大；你也欲乎人得著福氣。祝福你的，我欲賜福給伊；咒詛你的，我欲責罰伊。地上萬族欲因為你得著福氣。」（創12:1f）亞伯蘭就照上主吩咐的話離開故鄉。凡上主要他做的，亞伯蘭就照祂所要的去做。
●亞伯拉罕獻以撒
亞伯蘭得著上主所賞賜的新的名，叫亞伯拉罕。有一日上主叫他將他在100歲的時所得著的子－以撒獻作燒祭。以撒是他獨生的子，也是他所疼的，上主叫他將以撒獻作燒祭。在冥時上主要他將子獻作祭，在透早他準備好勢，就都帶以撒與奴僕去摩利亞山去。到山頂，他和以撒起祭壇，又將柴舖在壇頂，然後就將以撒綁起來，囥在壇頂。在欲下手殺他的子的時，天使出面阻擋。亞伯拉罕照上主的命令將他的子以撒獻作燒祭，凡上主要他做的，他都照祂的意思去做。
●約伯在患難中無離開上主
咱知約伯是義人，上主謳樂他講：「地上無人親像他完全正直，敬畏上帝，離開諸個歹。」（伯1:8）但是他卻遇著患難，他失去他的子、查某子與所有的財產。為著失去子兒、查某子，他非常傷悲，但尚且敬拜上主講：「我褪裼出老母的胎，也欲褪裼倒去許；耶和華賞賜，耶和華拿去。著謳樂耶和華的名。」（伯1:21）凡上主所要的，約伯都俾祂拿去。
了後，上主又容許撒但攻擊，致到全身軀攏生毒瘡。他的某看見安爾，對他講：「你尚且執守你的純全嗎？著棄絕上帝，來死！」（伯2:9）約伯對她講：「…咱從上帝受福氣，豈無從祂受災禍嗎？」（伯2:10）凡上主所欲加在他身上的，無論是福氣抑是災禍，他攏全盤接受。
多多人掠作先知是足好康的代誌。有影，會得可成作上主的代言人，真正有榮光；但是上主要先知傳報的消息，無抵抵是好消息，有多多時陣是警告、責備、攻擊或是好親像在咒詛人的壞消息。明理的人知他所講的是出於上主，無明理的或是背悖上主的，都掠作他是在「妖言惑眾」，就攻擊他、陷害他、苦毒他。盡忠的先知，親像以賽亞、耶利米，吃好膽藥仔，「明知山中有虎，偏向虎山行」。
●以賽亞看見上主的榮光
以賽亞是先知也是祭司。有一日，上主在聖殿中向他顯現。他看見上主的榮光，也看見自己的污穢，就講：「我有災禍啊！我滅無啦！因為我是嘴唇無清氣的人，又待於嘴唇無清氣的百姓中，因為我目睭有看見王－萬軍的耶和華。」（賽6:5）上主就差西拉兵，用火鉗從壇頂拿熱熱的炭，沾以賽亞的嘴唇，宣佈他的罪已經除去，他已經得著赦免，他成作清氣的人。接續他聽見上主的聲講：「我可差是誰啊？是誰欲為阮去？」以賽亞就應講：「我在此，可差我！」（賽6:8）凡上主所要的，雖莽不知實際的內容是安怎，以賽亞勇敢應講：「可差我！」
●耶利米的驚惶
耶利米在尚未被呼召成作先知的時，就知在背悖的時代作先知一定不是什麼好康的代誌。有一日上主的話臨到他，呼召他成作先知，他就推辭講：「嗐啊！主耶和華啊，你看，我未曉講，因為我是囝仔。」但是上主對他講：「你不可講我是囝仔，因為我既有差你，你著去；我既有吩咐你，你著講。」接續的話都不至恐怖，「你莫得驚伊，因為我與你在的，欲救你。」上主無隱瞞耶利米在將來會遇著人的大對敵。接續，上主伸手摸耶利米的嘴唇，又吩咐他講：「你看，我有將我的話下於你的嘴。看啊，今仔日我設立你於列邦列國的頂面，是為著欲拔出、欲拆毀、欲敗壞、欲捙倒，欲建立、欲栽培。」（耶1:6,7,9f）上主坦白對耶利米講他的任務是非常艱難；甭講啥，連咱聽見上主所聽的也不敢引這個頭路。俾耶利米看見二個異象後，上主吩咐他講：「你著縖腰，起來，將我所吩咐你一切的話加伊講；莫得因為伊來驚惶。看啊，因為我今仔日俾你成作堅固的城、作鐵柱、作銅牆，來抵擋全地以及猶大的列王、貴族、祭司，與這所在的眾百姓。」（耶1:17f）你看，上主要耶利米作先知來成作「人民的公敵」。若是你，你欲接先知這個職份否？耶利米接落這個任務，而且用他的性命去完成這個使命。凡上主所吩咐的，就算犧牲性命，耶利米也無推辭。
●驢子的主人
最後一次到耶路撒冷過逾越節的主耶穌，在第一日，騎驢仔進入耶路撒冷城。這隻驢仔是他叫他的學生進入附近的一個莊頭牽來的。這隻驢仔不是他的，也不是他12個學生中的一個的。當他的學生的解這隻驢仔的索仔的時，按照《路加福音書》的記載驢仔的主人問講：「解驢仔欲啥事？」學生都講：「主欠用它。」彼人都俾伊牽去。凡上主所欲用的，驢仔的主人都俾祂拿去。
●保羅的勇敢面對
在第三次傳道旅行結束後，保羅、同工和地方教會的幾位代表，帶著各教會為耶路撒冷教會捐獻的款項到耶路撒冷去。在旅途中，有好幾位先知預言保羅在耶路撒冷會被掠，送交官府。他的同工，還有沿路經過的教會的弟兄姊妹，攏勸他不可去耶路撒冷；但他決意要去。他講：「尒啥事啼哭，來cho-chak我的心啊？我為著主耶穌的名，呣若受綁，就死於耶路撒冷也已經便啦。」（徒21:13）就算上主要他死，保羅也甘願為主犧牲他的性命。
●耶穌的推辭
面對死亡，耶穌的表現和保羅的絕然無同。保羅給人的感覺是足有勇氣面對死亡，但是耶穌卻「憂悶、chhan-chhoeh」，又加學生講：「我的心真憂悶，到欲死。」（太26:38）為什麼上主的子會有這款的驚惶？①在十字架頂，他不若要承受肉體的苦痛，又要承擔世上所有信他的人的罪債。你想看嘜，古今將來有偌多人信他？諸個人的罪攏加於他的身上，那是何等的恐怖？②對他來講，頂面所講的許個苦痛尚不是他未得承擔的，他上驚的就是，當他被上主掩面不看的時，彼個苦痛絕對不是咱想會到的。
雖莽他的心憂悶，耶穌猶原順服上主的安排，他對上主講：「我的父啊，若會做得，著乎這個杯離開我。總是，呣是照我所愛，是照你所愛。」（太26:39）凡上主所加於他身上的，耶穌就順服來承受。
●撒母耳聽見上主的呼喚
撒母耳在斷奶了後就被父母送到示羅，奉獻給上主來差用。後來漸漸大漢，就成作祭司以利的助手。有一日上主叫撒母耳，撒母耳掠作是以利在叫，就走去找以利。連續三次了後，以利纔明白是上主在叫他，就教他安怎回應。第四次又聽見上主在叫，撒母耳就應講：「請講，你的奴僕在聽。」要照上主的意思去行做，都要明白上主的心意，都要聽見他的聲，他的指示。如果咱未得可聽見他的聲，都無可能照他的意思去行去做。
欲聽見上主的聲，著要知他是安怎對你發聲。①通過這本聖經，祂對你出聲；②通過每一回的講道，祂對你出聲；③通過靈修書刊，祂對你出聲；④通過人、通過事件、通過大自然，祂對你出聲。
為著牧養祂的羊群，上主設立牧者與長老；為著幫助牧者、長老專務於祈禱與傳福音，上主設立執事。咱長老教會是相信通過會員大會顯明他的旨意，給他定著的人出來牧養、事奉兄弟姊妹。既然咱是安爾相信，盼望咱在會員大會被選出的人勇敢，無推辭來接落受交託的使命。
有一句話流行於教會界，就是「殷勤作工，無空空」。
這句話不是不對，因為保羅在《哥林多前書》15章10節有安爾的教示：「我所疼的兄弟啊，尒著堅固，無搖泏，常常盡力於主的工；因為知尒著磨於主的呣是空空。」
不對的是一些人運用這句話的心態。伊期待通過他所著磨的，來向上主換取他所意愛的福氣，譬如好額、權勢、名聲、幸福、愛情…等等。
服事上主只有一個動機，就是「回報他的疼」。上主許爾疼你，俾你活著，將多多好物賞賜給你享受，又赦免你所有的罪過；耶穌許爾疼你，為著你的罪死於十字架頂；聖靈許爾疼你，保守你離開一切的災害，也指點你做對的代誌。他即爾疼你，你欲安怎回報他？他也無欠缺什麼，需要你提供。咱只有通過服事咱的兄弟姊妹來回報他的疼，他欲在這服事中得著大的榮光。《彼得前書》4章11節後半節講：「有相服事的，著親像用上帝所賞賜的力，俾上帝從耶穌基督於萬事會得著榮光。」
從《彼得前書》4章11節後半節，咱也知服事只有一個目的，就是：「俾上主得著榮光」。
咱來看耶穌所坐的彼隻驢仔。牠服事耶穌，載耶穌進入耶路撒冷城。在服事中，牠無得著人的謳樂；在服事後，牠又恢復以前的生活。無人因為牠載過耶穌，加牠立一個碑，或是接牠轉去，好款待牠，俾牠穿好吃好。這個使命結束了後，牠都和其他的驢仔一樣，在各日的載物件、載人或是拖車中來過了牠的一生。
主耶穌曾對他的學生講：「奴僕行所命令的，豈有加伊說謝嗎？安爾，尒已經一盡行所命令尒的，就著講：『阮是無利益的奴僕，行所應該行的若定。』」（路17:9）咱的主耶穌用他的寶血贖回咱的性命，咱是他的奴僕。咱行他所命令他，他實在呣免加咱說謝。
不過上主的賞賜是超出咱所求所想所期待的，雖然他呣免加咱說謝，但是他總會獎賞咱，親像他會提高咱在他心中的地位，將更較重要的使命交託給咱。在《馬太福音書》25章21節有安爾的記載：「好啊，好又盡忠的奴僕，你於少的已經盡忠，我欲設立你來管多的；可入你的主人的快樂。」又親像他為咱備辦榮光的冕旒等候欲賞賜給咱。保羅在寫給提摩太的信中有安爾講：「我已經爭戰好的爭戰，已經盡跑走的路站，已經守所信的道理。昑了後，有義的冕旒加我備辦下的，…」（提後4:7）上主照他的意思獎賞，咱無應該對他講，我欲持這持那。
弟兄姊妹：
服事主是應該的，因為這是咱對上主的回報。祂疼咱，差他的聖子耶穌為咱死，贖回咱賣給罪的性命，咱成作他的奴僕。既然他是上主，既然耶穌是主，咱是他的奴僕女婢，咱要照他的話去做。今仔日上主欲通過眾兄弟姊妹選出長老與執事，你若被選出，盼望你憑著感恩的心來領受，也憑著回報的心來服事。服事只有一個動機就是回報上主的疼，服事只有一個目的就是俾上主得著榮光。咱盡忠去做，上主會獎賞咱，但是他照他的意思獎賞咱，咱無應該加他講，我欲持這持那。
No comments:
Post a Comment