講題：八福（二）
經文：馬太福音書5章3-10節
弟兄姊妹：平安！
請問：有人透世人未曾憂悶、煩惱的，請舉手。
哇！安爾咱攏是有福氣的。
耶穌教示咱講：「憂悶的人有福氣！因為伊欲受安慰。」
為什麼憂悶的人有福氣？因為伊欲受上主的安慰。
為什麼上主欲安慰憂悶的人？
豈所有憂悶的人攏會得可得著上主的安慰？
為什麼人會憂悶？
人若做會到，人若會解決，我想無人會憂悶。人會憂悶就是因為他感覺他無辦法去解決目前的艱難，所以他會憂悶他無辦法承擔彼個艱難所帶來的後果。
譬如破病。如果人深信這個病無啥，只要吃藥仔、息睏，他的身體都會康復，安爾，他未憂悶。人會憂悶就是因為他認為有可能無藥可醫，有可能他的病會愈來愈嚴重，有可能他會因為病嚴重開費多多錢，致到影響家庭的經濟，有可能他無辦法又工作，家庭都無收入，有可能他因為病嚴重來過往，過往了後，他不知欲去叨位，他不知他厝內的細子是誰欲照顧、栽培…等等。
人若感覺無辦法去解決所遇著的艱難，大部份的人會去找資源來跟他逗相共或是替他解決問題。這個幫助的資源絕大部分是人。但是當他所會得可找著的人也未跟他逗相共或是未得可替他解決問題的時，他會找求超自然的氣力，就是他所敬拜的神明或是上主。
在舊約時代，以色列人的兩個王國北以色列國與南猶大國，遇著艱難的時去找強的國家來保護伊，或是找附近的國家結成聯盟，看會得可得著「團結就是氣力」的效果否，或是找求異族的神明，就是不求上主。上主就分別將伊交給亞述帝國和巴比倫王國。諸個歷史攏跟咱題醒一項代誌，都是：人若遇著艱難的憂悶的時，他所找求的若是人或是神明，上主就未安慰伊。獨獨找求上主來幫助的、來拯救的，上主就安慰伊，給伊盼望，給伊氣力。
有三種的憂悶，上主非常看重。
①為著自己的罪來憂悶：《詩篇》51篇17節安爾講：「上帝所愛的祭就是憂傷的神；上帝啊，憂傷痛悔的心，你無欲看輕它。」這首詩篇是大衛犯罪了後所寫的。在先知拿單指出他的罪了後，他馬上懺悔認罪。人若願意認罪懺悔，上主必定赦免他。在《約翰壹書》1章9節有安爾的記載：「咱若認咱的罪，他（上主）是真實公義，欲赦免咱的罪，洗除咱攏總的不義。」咱犯罪了後，聖神或是良心會責備咱。咱若為罪來憂悶，來懺悔，上主安慰的話都臨到。彼得三次無認主，在雞啼了後，他纔發現自己的所做不對，就大啼哭。在耶穌復活了後，耶穌問他「你疼我嗎？」然後將他的羊交給彼得養飼，咱若不肯承認自己罪，不若得未著上主的安慰，反轉會受著上主的管教，責罰。以色列王國的第一任君王掃羅就是因為不肯認罪，所以上主lu他的位。而且咱是講聖神白賊，枉冤好人，因為上主應許咱講：「咱若講未曾犯罪，便是乎他作講白賊的，他的道理無待於咱。（他也是指上主）」（10）
②為著別人的沉淪來憂悶：只有在關心別人的生死的時，他纔會為他的沉淪來憂悶。在誡命中第二大的，就是「你都疼鄰邊親像自己。」耶穌留落的新的誡命就是「要彼此相疼」。《約翰壹書》有講：咱若未去疼看會見的兄姊，就無可能去疼看未見的上主。一個為著人的沉淪來憂悶，就是行上主的命令，當然受著主的看重。在耶利米先知的身上，咱可看見這個。約拿因為看見自己的同胞受著亞述人的凌辱欺壓，非常怨恨伊。所以上主要他去亞述帝國的首者尼尼微去警告尼尼微人，他拒絕，逃走。了後上主差大魚將他吞了腹內，他纔肯降服。在他看見尼尼微城的人從頂到下攏悔改，非常受氣，上主就責備他無疼心。
③為著自己的做未到或做未好來憂悶：對所疼的人，咱會盡咱所會的來好款待他，親像咱疼咱的是小，盼望給伊上好的。咱給伊的比其他的父母較輸，咱的心都會感覺對囝仔虧欠。若遇著這款的情形，你會安怎做？有的人不若盡他的氣力又超出他的氣力來供給囝仔。這個「超出氣力」就會引出罪惡，不是打壞自己的身體，就是做出犯法的代誌。若是我，我未安爾做，我盡我的氣力，但我未超出我的氣力。我會心裡對囝仔講抱歉，啥人叫你許歹命成作我的囝仔。咱若疼上主，我相信我也會盡咱的氣力去滿足他的期待；但是我也盼望你無可超出你的氣力，因為超出氣力都會引出罪惡。在馬大的身上，咱看見這個。她因為做未去，又看見馬利亞閒閒坐於耶穌的腳前，和耶穌開講，心裡都無爽快。服事要歡歡喜喜。甘心樂意的事奉，主會滿滿祝福。在保羅的身上，咱可看見這項代誌，就是「如果你想欲為主多做啥的時，主會加添你的氣力」，因為保羅安爾講：「待於賞賜我氣力的，我事事攏會。」你想全能的上主豈無可能「在曠野開道路，在沙漠開江河」？他都有可能給未無子的生子，給人從死復活，他怎無可能將你期待、需要的氣力、才能賞賜給你。不過，在尚未得著氣力的進前，不可做超出氣力的代誌。因為那會引出罪惡。
這三種的憂悶是上主所看重的，他豈未安慰伊？
不過也有上主所不要的憂悶。
①為著自己情慾的未滿足的憂悶。有的人為著所積聚的錢財的無夠的憂悶。關係這款的人，保羅有安爾的勸勉：不可下尒的盼望在無定著的錢財。又講：「貪財是萬惡的根源。有人戀慕它，就受迷惑來離開道理，用多多艱苦自己剌鑿。」有的人為著靠山無夠力的憂悶。關係這種人，《詩篇》20篇講：「有人倚靠車，有人倚靠馬，獨獨阮欲講起耶和華–阮的上帝的名。伊仆落跋倒，阮就起來，企在在。」《詩篇》146篇說：「尒莫得倚靠君王，莫得倚靠世間人；伊一個仔未會幫助。他一下斷氣，就歸土；他所計劃的，於彼日就消滅。」
②為著對上主無信任的憂悶：
保羅勸勉羅馬教會講：「萬事相與來乎疼上帝的人得著利益。」上主也自己講：「豈有我做未來的事嗎？」但是多多基督徒猶原不肯倚靠他。你知影許個無信主的人看見你的憂悶曾安怎想否？非常有可能是–「信上帝有較chhoa？」或是「這個人平常時講他 的上主是何等疼你，講他的上主偌gau抵偌gau，我看他是的講白賊。」
③為著未得可改變的事在憂悶：
既然代誌是未得可改變，無論你安怎憂悶，煩惱，代誌無可能改變，但是你欲活得無快樂、無平安中。何必苦呢？既然未改變，就鼓勵自己講：「在這件代誌當中，一定有上主要我學習的。彼個一定是對我有利益，若無就是一定會得可高舉上主的名。」
④不肯去改變會得可改變的事卻坐在憂悶：
憂悶未得可改變什麼；但是會阻礙咱的思考力、行動力和判斷力。既然會得可改變，咱就勇敢面對，想辦法去改變，消除咱的憂悶。
當然有可能雖莽咱想盡辦法卻無辦法去改變，但至少咱也較心安，因為咱已經盡咱的氣力。
弟兄姊妹：
當在憂悶的時，咱要看咱的憂悶是什麼款的憂悶。如果是為著自己的情慾得未滿足，或是因為對上主無夠額的信心，或是為著未得可改變的代志在憂悶，或是因為不肯去改變會得可改變卻坐在煩惱的憂悶，因為這不是上主所要、所歡喜的憂悶，咱要想辦法跳離開諸個憂悶。
如果咱的憂悶是為著自己的罪過，為著別人的沉淪，為著自己做未到或是做未好，安爾，咱可歡喜等候上主的安慰和賜福。因為他有應許咱講：憂悶的人有福氣，因為伊欲受安慰。
No comments:
Post a Comment