講題：平安夜
經文：路加福音書2章15-21節
信息：（請用台語閱讀）
弟兄姊妹：平安！
聖誕恭禧！（聖誕快樂！）
為什麼耶穌出生的晚暝上叫平安暝？
如果有一個未信的朋友問你「為什麼耶穌出生的晚暝上叫平安暝」，你欲安怎回答？你會安怎回答？
想看嘜！如果有人問你為什麼咱將12月24日暗時稱做平安暝，你欲安怎回答？
咱教會會將12月24日暗時稱做「平安暝」，有可能是因為在耶穌出生的彼日，天使和天兵在天頂唱歌謳樂講：「於極高的位榮光歸於上帝；地上和平於他所歡喜的人的中間！」在漢文的聖經是安爾講：「在至高之處榮耀歸與 神！在地上平安歸與他所喜悅的人！」白話字的「和平」，漢文翻譯作「平安」。就因為天使、天兵有安爾吟講，所以彼個暗冥稱做「平安暝」是講會通。但是為什麼「耶穌的出世」與「平安」（或與「和平」）有關係？
在天兵出現進前，天使有對顧羊的講，「今仔日在大衛的城裡，已經為尒生一個拯救的。」就因為耶穌是拯救的，所以他欲帶來平安，帶來和平。
在耶穌出世的彼個時代，猶太人期待拯救者出現來救伊脫離羅馬帝國的統治。猶太人講因為自己是上主的選民，所以高過一切的外族；但實際上伊卻受著外族羅馬人的統治，自尊心強的猶太人忍受未牢這款的羞辱。而且羅馬政權用強的手段扶助希律在猶太地的地方官，這個希律有以東人的血統；又有一些抽稅的靠羅馬政權的支持來剝削自己的同胞。所以猶太人期待一位救世主出現，來領導伊打敗強權羅馬，建立一個強盛的王朝，又統治外族。安爾，這位救世主就欲帶平安、和平給猶太人。
但是主耶穌沒領導猶太人打倒羅馬政權，安爾，他帶來的是啥咪款的平安？是啥咪款的和平？他帶來的平安就是給人與上主有和好的關係，他所帶來的和平是給人與人有和好的關係。欲和上主有和好的關係，人就著盡心、盡性、盡力、盡意疼上主；欲和人有和好的關係，人就著疼人親像自己。
現世代的人與耶穌時代的人相款，人與上主的關係，不是疏遠，就是對敵；人與人的關係也是安爾。在足多足多人所做的善事頂頭，咱可看見「交易」－這回我疼你，都是盼望你下回疼我；你若下回疼我，咱都無相欠。抑是這回我疼你，因為你頂回疼我；這回我疼你了後，咱兩人無相欠。耶穌帶給世間人的疼，無論是對上主抑是對人，攏是「永遠未無去」、「永遠未改變」。在翁某的關係中，咱上容易明白「疼」是什麼？在一些翁某的身上，咱看見伊的疼無因為「病痛」、「失敗」、「宋鄉」、「老邁」、「殘障」…來改變；但在另外一些翁某的身上，咱看見伊的疼因為遇著在某一方面或某一些方面比對方較好，就改換疼的對象；又在另外一些翁某的身上，咱看見伊的疼因為對方不能滿足他的需求就無去。
就因為呣識「疼」是什麼，就因為未曉「相疼」，所以這個世間纔會即爾亂，即爾黑暗，有多多歹代在社會的多多所在發生，甚至在人的厝內發生。耶穌來就是欲教咱什麼是「疼」，也欲幫助咱將「疼」活出來，給咱與厝內的人的關係改變，給咱與人的關係改變，給咱與上主的關係改變。
問自己：「你的疼是真的抑是假的？你的疼是永遠未改變？你的疼會因為時間的經過來改變否？」
如果你的疼未定著，會因為時間、空間與環境的改變來改變，你著來找耶穌，偌親像在曠野的牧者入城去找耶穌一樣。他欲將真正的疼賞賜給你。有這個疼，你和人的關係都會和好，你都和人「和平」企起在人間；你若有這個疼在心中，你都和上主和好，都有平安在你心中。
如果你和人的關係總是喬未好勢，如果你心中常常欠缺平安，你都要來找耶穌，偌親像顧羊的去找耶穌一樣。
不是咱找著耶穌都好，不是咱和人和平相處都好，咱四周圍的人，伊的內心豈採無平安，伊豈採未得可和人和平相處。主耶穌交託你一個使命，就是將他介紹乎人認識，乎許個人也會得可得著平安，得著和平。這偌親像顧羊的朝拜耶穌以後，將伊所遇著的一切播揚出去。
弟兄姊妹：
聖誕的意義，不若慶祝耶穌的出世，也要尋找耶穌，迎接耶穌進入你的心，做你的主。另外也要將耶穌介紹給人認識。
No comments:
Post a Comment