講題：八福（八）
經文：太福音書5章3-12節
信息：
弟兄姊妹：平安！
相信咱大部份的人曾聽過大陸的地下教會受著伊的政府的窘逐。伊會使在三自教會做禮拜，就是未使在其他的所在做禮拜。三自教會的牧養和教導攏在政府監督之下，伊是聽從政權較過頭於上主，所以有多多基督徒無要在許個教會聚會。
但是在台灣，在憲法的保障的下面，基督徒在無妨害其他的人的自由的前題下，無論什麼所在無論什麼時，攏會使聚會。所以因為信仰被窘逐、詈罵、誹謗的代誌偌親像離咱真遠，與咱無啥關係的款。但事實上豈真正安爾？
咱先來看在耶穌的時代，一個信耶穌的人會遇著什麼窘逐。
猶太人的生活中心是會堂。這個會堂偌親像現時的里民活動中心一樣，無論是交誼、喪喜事或是社會關懷攏在會堂中進行。在會堂所企的社區的猶太人偌親像一家人一樣，一家口仔遇著什麼代誌，伊所屬的社區都看作是厝內的代誌。譬如一個人失業，社區的人都主動幫助他找頭路，介紹頭路，若遇著什麼欠缺，會堂的主管都發動募捐；收集大家的疼心。伊欲幫助人，較無要用個人的名義去做，免得俾受幫助、賙濟的欠人的恩情，伊是通過會堂隱名去幫助。平常閒的時，伊會到會堂找人開 講，找gi-liung。
在彼當時，人若信耶穌，就被社區拒絕，會堂不准他入去。閒仔時，他未使去會堂找人開講；厝裡有喪事無人來逗相共，有喜事無人來逗鬧熱，有欠缺無人來逗關心；…會得可安爾講，一信耶穌，彼個人就從他以往的人際關係抽離。所以在耶穌的時代，一個人若欲皈信耶穌，都要有相當的覺悟與備辦心。
不若安爾，一個人欲信耶穌，不若被社區拒絕，也要承受從厝內的人的壓力。我來假設一個例，有一個猶太人名叫大雄，聽了耶穌的講道又看見耶穌行神蹟醫好跛腳的、睛盲的、臭耳聾的…心裡就相信耶穌是上主的子，就是救世主彌賽亞。一轉去就和厝內的人分享他的看見與歡喜。他的爸爸、媽媽、太太攏未得可接受他改變信仰，心裡想：一家口仔攏信同一個信仰不是偌好，你怎欲與人無同款。不過因為同款信上主，也遵守聖經，雖然無同，但差不多，尚且會得可接受。過無幾日，與平常同款，大雄的爸爸去會堂，大雄的媽媽去菜市場買菜，大雄的某在水井邊洗裳，在許的親戚、朋友、厝邊都關心問，「聽講尒兜大雄去信耶穌，豈是事實？」「彼 個耶穌…」「你都要苦勸他…」也有一些人，藉著這個機會kau-se、修理。起頭大雄的爸爸、媽媽、太太攏忍起來，但是大雄的爸爸都無 要會堂，屈於厝內；大雄的媽媽、太太也足無要去買菜或是去洗衣，每回轉來心情都足無好。有一日，大雄無細禮講不對話，他的爸爸、媽媽、太太性地都gia起 來，偌親像火山爆發一樣，將平常日承受的壓力攏傾出來。氣解了，就苦勸大雄甭去信耶穌。大雄確信耶穌是救世主，堅持不放棄；他的爸爸、媽媽、太太，看溫情的攻勢無效果，就用各種激烈的手段迫大雄越頭。
大雄承受的壓力不若安爾，他一踏離開厝，就看見厝邊的異樣的眼光，也聽見厝邊在他的後壁面chi-chi-chu-chu。不若安爾，社區的是大看著他，就揮手叫他過去，有的溫柔共他講，「大雄，信耶穌有什麼好…」有的用罵的，講：「你這個不肖子，信什麼耶穌，你豈不知…」過去看他不順眼的人，就百般譏笑、kau-se…。不若安爾，原本交觀他的生意的人客中有未少人聽見他信耶穌，就去交觀別人的生意。
耶穌知信他的人已經會遇著窘逐，受人的詈罵、毀謗，將來也會有更多的人遇著窘逐，受人的詈罵、毀謗，所以就激勵伊或是題醒伊要堅持到路尾。因為天國是伊的，因為伊在天裡的報賞是大的。
為什麼為著義受窘逐的人會得可得著天國？為什麼為著耶穌受詈罵、窘逐、誹謗的人會得可得著天裡的報償？
有幾個理由：
①伊所行的好是真正的好，不是假的，不是做乎人看的：如果是假的，如果是做乎人看的，魔鬼纔未使弄人來攻擊伊，反轉會照顧伊，通過伊為害社會，通過伊引誘人犯罪。
②為什麼黃金要落火爐？就是欲通過火，將黃金的雜質拿掉。在人的信仰裡面起頭有多多的雜質，親像對上主無理的期待，在多多的歹隱藏在人的心裡，上主就是藉著其他的人的對敵、窘逐、詈罵、誹謗來拿掉諸個。伊的信仰都愈來愈真，伊的心都愈來愈清氣。
③在人的詈罵、誹謗中，伊可發現人的讚美是許爾容易反起反倒。在伊尚未信耶穌的時，伊所做的伊攏看作好，謳樂兮會ta舌；信主了後，伊做的攏與以前同款，但是在許個人看無一項是對，嫌兮流沬。在人的窘逐中，伊發現伊以前所倚靠的是許爾無可靠，不是乎人搶去，就是變作無功效。所以伊就漸漸有這個覺悟：欲得著人的謳樂，不如乎上主歡喜；欲倚靠世間人或世間物，不如倚靠上主。伊就漸漸注目屬天的報償，未又追求地上的享樂。
④伊的信心會愈來愈大愈來愈勇：在受窘逐、誹謗、詈罵中，伊發現靠自己的氣力實在無辦法去抵擋人的對敵，伊就仰望上主，上主就行權能在伊的身上，乎伊有夠額的勇氣去面對，乎伊有夠額的聰明智慧去化解或是逃閃。伊經歷上主的權能，伊的信心都愈加添。
⑤伊留落嫷的模樣，成作後來的人信的模範。以後的人看見伊所受著的與所表現的，在另日許個人若受著窘逐、詈罵、誹謗，伊都會想起講，啊！前什麼人也遇著。他會得可倚靠主耶穌的氣力較嬴許個歹，我也會得可倚靠主耶穌的氣力較贏過諸個歹。
⑥上概主要的是伊顯出對上主的忠誠，就是無論什麼境遇，就算是死，伊猶原無放棄伊的信仰。《希伯來書》講：「咱若持守起頭的深信堅固到路尾，就有份於基 督。」（3:14） 主耶穌對激勵士每拿教會講：「你著盡忠到死，我就欲用活命的冕旒賞賜你。」（啟2:10）
現代不若在極權的國家基督徒受窘逐，在民主的國家基督徒也會遇著窘逐。基督徒在宗教自由的環境也會遇著窘逐。
①人對咱的要求會比對其他的人的要求較高：因為咱的信仰是強調上主是唯一的上主，與主張「萬教歸一統」的其他宗教不同。既然咱講所信的纔是真的，別人就會採取較嚴的規格來要求咱。「尒基督徒竟然是這款型…」「我看尒基督徒與一般人相款…」「尒基督徒吼…」雖莽人用較高的標準要求咱是無公平，但是這對咱來講是好事，伊的要求成作咱進步的動力。咱應該比人較好，纔會得可在人的面前作光作鹽，纔會得可因為好所行來歸榮光於上主。但是咱不是靠自己的氣力，靠修行來行好，是靠賞賜咱氣力的主耶穌。咱信主有二個階段，第一階段，就是通過洗禮顯現咱的信，通過咱的信得著上主稱作義；第二階段，就是倚靠主耶穌的氣力來成 聖，清氣自己。無信主的人對咱的要求，就是在共咱講，咱尚且有進步的空間。信主一久，咱心總是會痲痺，掠目前的狀況作滿足。我已經未鄙仔，無九十分也有八十九分。但是經人的批評、指責，咱纔發現甭講八十分，連五十分都無。安爾咱就知要倚靠主耶穌的氣力來成聖。
欲安怎倚靠主耶穌的氣力來行好成聖？不是去找許個有靈恩的人替你祈禱，不是去參加奮興大會或是靈修會，不是去找一個修道院隱遁。因為你去找有靈恩的人替你祈禱，你去參加奮興大會或是造就會，你去找一個修道院隱遁，所得著的答案是你若欲倚靠主耶穌的氣力去行好成聖，你一定要禱告、讀經、敬拜。在私底下，你要禱告、讀經、敬拜；在聚會的所在，和兄姊逗陣禱告、讀經、敬拜。
我知有人無要禮拜一起頭的敬拜謳樂。你有你的口味，教會尊重你；但是在敬拜謳樂中，你不若會可得敬拜謳樂，也會得可學詩歌轉去厝唱。敬拜謳樂團契的使命不若要引導尒敬拜，也要教尒學會曉詩歌。可惜的是，因為著作權法，教會未當copy詩歌和譜。求主乎咱有聰明智慧來突破這個。在尚未想出較妥當的方法進前，有二條路咱會得可行，①在敬拜謳樂的時間咱盡咱所能力來學；②招集幾個同伴，開幾百元買CD和詩 歌本，然後大家互相交流。如果你會曉用電腦和上網，網路有多多詩歌的影片，親像youtube。你會得可一面觀賞一面學。
第二種的窘逐是你會失去朋友。因為你是基督徒，有一些所在你的朋友都未招你去，有一些代誌你的朋友都未招你去做；又因為你要聚會、服事，有一些活動你未得可參加，你的朋友招你一次、二次看你攏未當，了後都pan-toan招你。就安爾，你和以前的朋友愈來愈疏遠。彼個時，咱要看開，人生總是有得也有失，失去以前的朋友，但是你可在教會找著新的朋友；而且安爾你會在信主以前的朋友中找出知己、真正的朋友，因為知己、真正的朋友未因為你都合未抵好就放你去，反轉他會互相配合，找出會得可相見面的時陣。如果有什麼朋友是你不甘失去的，你都祈禱主，給你有機會導他來信主。咱要知人所期待的不是跮踱的朋友，是患難的朋友。你若行得好行得正又有愛心，總有一日人會發現有你這個朋友較好於有千個萬個跮踱的朋友。
第三種的窘逐是魔鬼的攻擊。你來信耶穌，魔鬼上無歡喜。他會想孔想縫藉著各種可能的機會將你拉倒轉他的身邊，作他的奴才。真多人在信主了後，真多基督徒在立志熱心事奉了後，相連續遇著一些代誌，心裡會想，我信耶穌，我熱心事奉，為什麼上主安爾報答我？上主不是全能的上主，為什麼他未得可保護我，免受一切的艱難災害？魔鬼利用諸個代誌要欲拆毀咱的信仰，將咱拉倒轉去；上主藉著諸個代誌欲：
①加添咱的能力，使咱學著新的才能：以後你遇著類似的代誌，你就知欲安怎處理較好。也因為你曾經歷過，因為你知安怎處理，都未驚惶失膽。
②磨掉咱性格的角，成作好逗陣的人：咱的性格有菱也有角，周圍的人，特別是厝內人，常常被咱角傷著。上主藉著所遇著的代誌，將諸個角仔磨掉。後回你若被人的角仔傷著，你都較會原諒人。
③學習依靠主：咱人總想欲靠自己解決一切的艱難，一旦發現無才調總是想欲逃閃。但是上主無容允咱安爾，他會鼓勵咱站在賞賜咱氣力的主耶穌去面對、解決。在咱倚靠主了後，發現有主可靠真正好，下回遇著艱難都意愛倚靠他。一回又一回的經驗加添咱的信心，後來就算是大風與大浪，咱猶原安穩自在。
弟兄姊妹：
黃金落火爐，經過火的燒融，就除去它裡面的雜質，愈來愈精純。信仰也是安爾，經過別人的窘逐、詈罵、誹謗，就除去它其中的雜質，愈來愈純，愈來愈堅定。上主一向都是用這款的方式，栽培他的子民的靈命，在早前許個先知人，人也安爾窘逐伊。諸個先知人持守伊的信仰到落尾，咱要學伊，也持守咱的信仰。不可因為窘逐、詈罵、誹謗來怨嘆、埋怨，反轉要感謝，歡喜快樂，因為咱將來於天裡的報賞是大的，因為天國是咱的，咱欲進入天國享受萬年的福氣。
不過八福有一個前題，就是為著行好受窘逐，為著信耶穌、為著傳福音，受詈罵、窘逐、誹謗，纔會得著天國，纔會得可在天裡得著報賞。人若為著歹所行受人的怨chhe，批評，攻擊，惡款待，就與這個福氣無關係。
No comments:
Post a Comment